ODE AN DE NEUS.

D`r is un reuze keuze an neuzn,

In de kleurn: blank – bruun – rood en poars.

Mar de kwoaliteit hef minder keuze,

Want goeie neuzn – die bint schoars.

 

Zo ok de neus van de politie,

Un wonderbaarlijk apparoat.

Effn snuffln an oe fietsie,

En hè kan ruukn – hoe ut`er mee steet.

 

De remm weigern un pietsie,

Ut veurlich is mar tweede keus.

Nem dus doarum de politie,

Steeds met eerbied bie de neus.

 

De neus is um te ruukn – koen en schrander,

Ut is un edel deel van oe gezicht.

op veuruutgang  gericht.

 

De neus mo-j  ens per joar gedenkn,

Op un spreidt de vleugels as geen ander,

Altied mooie winderige dag.

Die is vaak in ut noajoar,

a-j  weer van un griep-ploag sprèèkn mag.

 

“De Gaulle”- woar zou die man toch wèèn,

As bie hum de neus ontbrak.

Hè zat altied in politieke zaakn,

Woar hè steeds zien neus in stak.

 

De neus spreidt zien nerveuze vleugels,

Hè snuuft en snottert onverveerd.

Oh neus – Oh neus – loat viern alle teugels,

Soms liek ie wel un briesend peerd.

         #### Ferdinand ####

Ode an de schaapkooi "Hoog Buurlo"

Zelf bin ik nog nooit - in disse schoapskooi e-wes,

Dus vroeg ik de herder – mag ik is mee.

Wie gingn al vrog – want dan is ut zo mooi,

Zè waarn net wakker – en kreegn wat heuj.

Goa-j mee - noar de schoapskooi,

Ut is er gezellig en ut ruuk door noar heuj.

Goa-j mee - noar de schoapskooi,

Ik wil er veur altied wel woonn.

De herder is woakzaam – hij kik in ut rond,

Mist hè un schoap – dan stuurt hè zien hond.

De reu die heet Kees – en de teef heet Chantal,

Ze lettn op de schoapm – op weg noar de stal.

Goa-j mee - noar de schoapskooi,

Ut is er gezellig en ut ruuk door noar heuj.

Goa-j  mee - noar de schoapskooi,

Ik wil er veur altied wel woonn.

D`r is altied un kering – de schoapm môtn trug,

Ze kiekn tevreedn – de dag geet zo vlug.

Ze bloatn van bliedschap – as de kooi oopm geet,

En dat er bie trugkoms – voer en vers woater veur hun steet.

Goa-j  mee - noar de schoapskooi,

Ut is er gezellig en ut ruuk door noar heuj.

Goa-j mee - noar de schoapskooi,

Ik wil er veul altied wel woonn.

##Ferdinand ####

                  BOERN VERSTAND.            

Kiek is um oe hen noe – d`r is wat an de hand,

Wie hebbm-er genog van – heul agrarisch Nederland.

Hoe kan ut zo verkeern – de wardering van ons is nul,

Un vergunning veur be-weidn – dat is toch flauwekul.

As dit zo deurgeet – steet-er straks geen koe meer in de wei,

Geen Nederlandse kaas – vleistomoat of scharrelei.

Stikstof Co2 – de boer krig alle schuld,

De beeldvôrming regeert – en de woarheid wôd verhuld.

Vlieg mar mooi noar Grieknland – Curaçao of Boekarest,

Ie besteld un nieuwe smart-TV – Ali Express zôrgt veur de rest.

En de snelweg wôd steeds breder – bouw Nederland mar vol.

Loat de boern mar crêpeern – Den Haag is niks te dol.

As dit zo deurgeet – steet-er straks geen koe meer in de wei,

Geen Nederlandse kaas – vleistomoat of scharrelei.

Stikstof Co2 – de boer krig alle schuld,

De beeldvôrming regeert – en de woarheid wôd verhuld.

De politiek hef ut bedach – de veestoapel half deur,

Mar zunder un verdienmodel – geet dat ech niet….heur.

Mar as-er voedselcrisis kûmp – of as-er oorlog dreigt,

Dan zal de wal ut schip wel keern – zodat de boer wardering krig.

                  ### Ferdinand ####

A-J VAN IEMAND HOUD.

A-j van iemand houd – dan hef alles meer zin,

Zo`n mailtje op oe PC – doar bi-j bes blie mee.

Ut wil zeggn, dat mensn an oe denkn,

En ok un bitje andach an oe schenkn.

Al is ut mar un berichie van niks,

Mar vaak betekent ut meer dan iets.

Soms is ut un reactie op un gedich,

En soms op un leuk berich.

Zie ik un mailtje binn komm,

Dan denk ik hè…. Ze weetn mien toch te woonn.

Ie goat dan snel noar de mailbox toe,

En dan lèès ie gauw van ut wie wat woar en hoe.

Dus hef iemand un leuk berich veur mien,

Wèès er zeker van…. Ut maak mien altied blie.

Mien mailadres is ulle wel bekend,

Ik vind ut leuk a-j af en toe is un berichie zendt.

As senioren heb wie noe wat meer tied,

Um te genietn…. Wereldwied.

### Ferdinand ####

AMBACHT DE BAKKER.

Zelfs nog vlak veur de wo.2 had un gemiddeld arbeidersgezin ut geld niet um oavervloedig te kunnen èètn, en zeker bie grote gezinn met veul kindern  was ut geen vetpot. Natuurlijk kwam dat ok deur de oorlog, mar ok net noa de oorlog in de joarn 50 van de veurige eeuw was ut nog best zuunig bie veul mensn in de knip.

Er was ok nog mar weinig aanbod in de bakkerie, bruunbrood, witbrood, roggebrood, beschuut, en veur de mensn die net iets meer te verteern haddn, die konn dan nog un krentnbrood betaaln.

Bolletjes en puntjes waarn nog mar mondjesmoat te kriegn. Wel was er regeringsbrood, dat was un heul grauw witbrood, en was dan ok goedkoper dan gewoon witbrood, dus de gezinn die wat zuuniger an môssn doen kochn dit regeringsbrood.

De bakker mos vrogger altied vrog zien bed uut, um zo zien brood rond 07.00 uur kloar te hebm veur de verkoop an zien klantn.

Hè was ok altied an ut sjouwm met de 50 kg. mèèlzakkn.

De bakkersknecht ging dan met un transportfiets met zo`n  grote rietn mand veurop gevuld met brood langs zien vaste klantn. Soms mos disse knecht wel un poar kilometer riejn veur un half breudje.

Heul vaak kwam ut veur dat de familie geen geld had op dat moment, en dan wed dat op e-schreevn, en wed dan betoald an ut ende van de wèèk as ut loon weer binn was.

Teegnwoordig hoef de bakker er niet zo vrog meer uut, dat kump umdat hè noe met un remrieskast warkt. De bakker zet ut deeg opgemaakt in de rieskast, en die kast kan hè instelln op un bepoalde tied zodat, as hè uut bed kump de rieskast op de juuste temperatuur kump zodat ut deeg geet riezn. En hè kan de oavn ok instelln dat disse op temperatuur is zodra hè in de bakkerieje kump. Met al disse tiedwins kan hè langer op bed blievn liggn. Wat niet inhoud de bakker maakt lange daagn en veul uurn.  (an ut ende van zien lèèvn, hef he nog sloap tekort).

Mar de bakker van teegnwoordig hef veul  meer broodsoortn in de winkel liggn. De meeste mensn (op enkele gezinn noa) hebbm noe geld um un mooi - goed en smakelijk stuk brood te koopm. Hoeveul soortn brood bint er teegnwoordig wel niet. wit/bruun- volkoorn – tijger – knip/bus – vloer – stok – spelt – chocolade.

Wit/brune puntjes – bolln met allerlei zoadjes – koffiebreudjes – croissants, en goa zo mar deur, dit is nog mar un kleine greep uut ut totale assortiment.

En dan nog mar niet e-proat oaver de feesdaagn – Kars – Poasn en as de winkel op un goed punt steet dan he-j  in de zomer nog de vakantie-gangers die met un goed gevulde knip toch wel vaak een bakkerieje binn loopm veur iets lekkers.

Keuze in oavervloed. Wat heb wie ut tog slech teegnwoordig.

                    

### Ferdinand ####