Gedicht`n bint alles en niets, gedicht`n bint emotie`s…. Ze vertell`n iets.

* A-j lôsloat wat oe verdriet dut, dan he-j weer twee hand`n vrie um ut geluk te griep`m.
* De hemel is bezèèjd met starr`n, die blink`n in ut licht van de moan, mar weet dat twee van die mooie lich-ies ok altied in oew oog`n stoan.
* Zonder vall`n en opstoan – zonder un lach en un troan…. Dan zou ut lèèv`n ok nooit bestoan.
* Liefde is….as un vriend van oe weg geet, en un gevuul bie oe achterloat dat niet te beschriev`n is.
* Wie in ut verleed`n kik, steet met de rug noar de toekomst.
* Goeie vriend`n bint moeiluk te vind`n, nog moeilukker te verloat`n, en onmeugluk te vergèèt`n.
* Denk`n oaver oe zelf - wie da-j bint, en hoe da-j`t doet hef geen spoed….a-j`t mar wel nauwkeurug doet.
* As oe hart arg bitter is, dan zal suuker in de mond ok niet help`m.
* Loat mens`n proat`n oaver wat ze wel weet`n, en niet oaver wat ze denk`n te weet`n.
* Geluk bestied vaak uut 3 ding`n – iets um van te houd`n – iets um te doen – en iets um te hoap`m.
* Geluk verdubbelt zich …. a-j`t met un ander deelt.
* Ut pad da-j goat is ut pad da-j kiest….un dag da-j twiefelt is un dag die-j verliest.
* D`r geet naarn`s zoveul tied in zitt`n as in noadenk`n.
* In un te grote verwachting, schuult vaak de grootste teleurstelling.

#### Ferdinand. ####

FILOSOFIE AN MIEN GEPENSIONEERDE VRIEND`N.

Ut geheim um gezond ouwer te wôd`n is – schoonheid.
Geluk van ut lèèv`n ku-j in zes woord`n umschriev`n.
Veur de ouwere lèèftied: Lèèf zonder zôrg`n.
Noa de ouwere lèèftied: Heb geen spiet.
Geniet van ut lèèv`n zoveul as da-j kunt.
Wach niet tôt da-j slech te been bint, mar goa alles doen wa-j wilt.
As de geleeg`nheid zich veur dût, zuuk dan contact met èèn van oe ouwe schoolkamaroaj`n of un oud collega van oe werk of un ouwe vriend/vriendin.
Geniet volop van de tied die-j nog heb, want denk er an, de joar`n die goat snel.
Èèt ok wa-j graag lust, ut is belangriek da-j oe gelukkig vuult.
Loat de dokter zôrg draag`n veur oe lichaam.
Loat de natuur zôrg draag`n veur oe lèèv`n.
Mar hou zelf de controle oaver oe humeur.
Draag zôrg veur de vier volgende schatt`n:
1. Oe ouwe lichaam: Draag zôrg veur oe gezondheid, want ie alleen kunt`er wat an doen.
2. Oe spoarfonds: ut geld wa-j zelf e-spoart heb, probeer dat ok zelf te spandeer`n.
3. Oe wederhelft: koester altied de mooie momen`t met oe wederhelft …. Èèn van jullie zal as eerste vertrekk`n.
4. Oe ouwe vriend`n: griep alle kans`n ze te ontmoet`n, want de kans um mekoar te ontmoet`n, wôd`n in de loop der joar`n steeds zeldzamer.

Vergèèt niet elke dag te lach`n of te glimlach`n.
Stroom`d woater keert niet terug, Zo giet ok ut lèèv`n.
Nem ut langs de goeie kant – en wèès gelukkug.

#### Ferdinand. ####

VROGGER HAD IK LOATER NOG.

Ik weet nog dat ik vrogger – op de stoeprand zat,
Met un stil verlang`n – noar ding`n die `k niet had.
Ik droom`m dan in kleur`n – van un step of un fiets,
Mar as ik dan weer wakker wed – zag ik van alles niks.
Want in mien jonge joar`n – was ut lèèv`n van un kind,
Slechs speul`n met illusies – en stoei`n met de wind.

Mar vrogger had ik loater nog – de toekoms was van mien,
Toen lag ut lèèv`n veur mien – noe lig ut achter mien.
Vrogger had ik loater nog – T`was al wat ik bezat,
Noe heb ik alles, mar ik heb – ik heb mien tied e-had.

In mien nieuwe auto – denk ik noe trug,
An mien kinderjoar`n – wat geet de tied tog vlug.
Heul veul mooie droom`m – werd`n werk`lukheid,
De welvoart gif met gulle hand – gebrek is uut de tied.
Mar tog – as ik die joar`n – zo snel veurbie zie goan,
Dan wens ik vaak in stilte – un tied die stil blif stoan.
De moraal van dit verhaal:
Wèès dankbaar van wa-j vrogger had, en wa-j noe heb.
Want denk er an …. Ie bint zo oud …. geniet`n zoveul da-j kunt.
#### Ferdinand.####

 

RECEPT VEUR DE DONKERE EN KOUWE WINTERMOAND`N.

Wach niet op un prettige dag – maar maak er èèntje!
Veur eig`n gebruuk of….veur iedereen!
Huusgemaak, caloriearm, glut`nvrie, en vegetarisch,
Zonder zout, suuker en kunstmatige kleur en smaakstoff`m!
Pas bie elk dieet!

Alle ingrediënt`n bint uut de lôsse pols.
Hier en doar een bitjen meer of minder is geen bezwoar.
Veurdeel….onbeperk houdbaar buut`n de koelkas.
Zôrg eers wel veur un grote kom.

  • Ingrediënt`n:
    Een portie tevreed`nheid.
    Volle bèker met glimlachies.
    1 ons vertrouw`m.
    Scheutje zôrg + 2 kôppies begrip.
    Snuffie oardigheid van oe mooie eig`nschapp`m.
    2 teen`n zelfrespect.
    1 èètlèpel zelfacceptatie.
    1 èètlèpel zelfvertrouw`m.
    Kruuj`n met een bitje humor noar keuze.
    1 èètlèpel geduld.
    Mespuntje verdroagzaamheid.
  • Bereidingswieze:
    Meng alle ingrediënt`n tôt een romig geheel.
    Paneer`n met wat licht en warmte.
    Garneer`n met wat vleugies vrolijkheid en respect.
    Snuuf de geur op, en loat oe zintuug`n prikkel`n.
    Pruuf bewus, en nèm dagelijks minimaal 1 portie.
  • Veur ut gebruuk:
    Trek iets sportiefs an – dat pas altied!
    Geef oezelf noa gebruuk altied un compliment.
    Want niemand weet bèter – hoe hard ie oe bes doet.

#### Ferdinand. ####

FLAUWE WOORDGRAPP`N

Klopt ut dat U van de Josti-band?

Hey … weet ie woar Guus Meeuw-is.

Weet ie hoe laat ut vliegtuug van Bridget Maas-land?

Wat vindt Armin van Buuren? … ik denk niks … want hee woont vriestoand.

Zou Johnny Hoes un breur van Saddam Hoes-sein?

Vrogger was Marco Bakker, en Annie Schilder.

Kiek doar kump Adri-aan loop`m, en ik denk ok dat ik Bas-sie.

Kiek doar rolt John van de Heuvel.

Disse muziek kan Frank Boeijen.

Ik heb zelf e-zien hoe hard Viola Holt.

Is Bert Er-nie?

De taal`n die ik sprèèk bint alleen Frans Duijts en engels.

Hee!! Weet ie woar Katja is? Ja.. zee is in de Schuur-man.

Woarum Koos Albers veur un zangcarriëre?

Heb ie de jas van Bassie … oh nee die hef Adri-aan.

#### Ferdinand. ####